بسم الله الرحمن الرحيم

السلام عليكم ورحمة الله وبركاته

رجعت بي الذكرى كم سنة ورى .. وتذكرت [ قمة براءتي ] <<<< وركزوا على هذي ..

الله يغفر لي بس .. كنت بنت ولا أشقى .. لو مسلطيني على اليهود وقتها .. يمكن أنهيهم من الحياة

أمس كان عندنا وحدة من جاراتنا .. وقالت لي تذكرين يا جواهر وش كنتِ تسوين في عيالي ؟!!

أنا بصراحة ما ذكرت .. مع إنها حكت لي الموقف .. لكن بنفس الوقت ما استغربت .. تجي علي ..

قالت إني آخذهم وأحطهم بمكان مرتفع [ دولاب / كرسي ... أي شي مرتفع بالنسبة لهم ] .. وأروح وأتركهم .. كذا نذالة ..

وثنتين من الحاضرات أيدوا كلامها .. وقالوا إيه .. أنتِ كذا .. وكانوا الحريم يشتكون منكـ

،

،

مرة بغيت أموت شغالتنا !!

كنا بإستراحة وكانت غرفة الشغالة عبارة عن غرفة داخل المطبخ ، وكانت الساعة تقريباً 2 بالليل ، رحت بشرب موية وجاء بيني وبين الثلاجة صرصور ( وإنتم بكرامة ) طبعاً رجعت ، وبنفس الوقت فكرت ، وقلت ليش ما أرش ( فلييييييييييت ) وأسكر الباب عليه وفعلاً سويتها << إرهابية .. وبعد ربع ساعة تقريباً ذكرت الشغالة ورحت لها ، لقيتها قاعدة تبكي وتكح ( أو تكح وتبكي ) .. وتقول ( تبغين تموتيني ) << طبعاً بلهجتها
والباقي ما أقدر أكمله لأسباب أمنية !!

،

،

والحمد لله النذالة كل سنة تنقص شوي .. ما تزيد ..

وهالمرة النذالة من زميلاتي وأنا طرف مشاركـ بصمت ..

مرة تهاوشنا مع أستاذتنا .. عددنا ثلاث .. وكلنا ياذا الثلاث جنب بعض وأنا اللي على الطرف ..

وحدة قالت بكرة بجيب ضب وإذا اندمجت في الشرح بنطلقه عليها ولاهيب دارية وين جاء منه !!

اتفقنا وتعاهدنا .. من بكرة جابت زميلتي الضب .. وبصراحة ضب بحياتي ما شفت مثله !! كبييييييييييييييير مررررررررررررة .. قلت : شوفي .. برأيي إنكـ ما تجلسين جنبنا والمملوح معاكـ .. البنت طمنتنا وقالت ولا يهمكم ولا تخافون .. ما راح يقربكم أبداً ..
طبعاً سكت وأنا مو متطمنة .. وبدت الحصة .. وأنا عيني على هالضب اللي حاطته بحضنها .. وتجهزه للانطلاق ..
شكت الإستاذة في حركاتنا .. ونادت اللي يم الجدار تحل مسألة على السبورة .. تمنيت إنها نادتني عشان أبعد عن الضب ..
زميلتنا ما عرفت وكعادة المدرسة وقفتها جنب السبورة لحد ما تنحل المسألة وتعطيها شوية تهزيء ..
أنا وزميلتي كثرت حركاتنا وهمساتنا .. وشكت فينا الأستاذة .. وقالت لزميلتي : وش اللي معاكـ ؟ .. قالت : ولا شي . قالت الإستاذة : قومي أوقفي أشوف .. زميلتي عشان تنقذ روحها حطت الضب بحضني ومن الروعة صرخت وطحت بكرسيي على ورى .. والضب قام يتجول بالفصل .. والبنات يتطامرون من أمكانهم .. وخذونا للإدارة .. بس أنا طلعت براءة .. واللي أكلها صاحبة الضب .

،

،

فيه أستاذة عندنا كانت تمنعنا من الجلوس في ممر قريب من فصلنا .. وكنا أنا وشلتي نعاندها .. ومع التهديد بالدرجات خفنا شوي .. وصرنا ننتبه .. ومرة من المرات كنا جالسين في الممر لأنها تأخرت علينا .. وجت وحدة من البنات مع الجهة الثانية غير الجهة اللي تجي معاها الأستاذة .. وقالت : يا الله للفصل أستاذة نورة جت .. ونتطاير كلنا وصار رجة كبيرة .. لدرجة إنا دخلنا الفصل وسكرنا الباب .. وبعد ما سكرناه شفنا الأستاذة نورة
ما درينا عنها إلا بعد ما قالت : وش فيكم ؟ وش صاير ؟
شافتنا نركض وركضت معانا ما تدري وش صاير .. لأنها وصلتنا قبل ما توصلنا البنت تعلمنا عنها ..

،

،

ومرة كان جاينا أستاذة دين جديدة .. وعاد حنا ما نخلي حركاتنا مع الأستاذات الجدد .. وكانت هالأستاذة قمة في الطيبة .. بس عيبها إنها تسوي روحها فاهمة بالدين .. لدرجة إنها تقول أسألوني أي شي وأنا أفتيكم ..
المهم هذاكـ اليوم كانت تقرأ القرآن ومتحمسة بزيااااااااادة .. لدرجة إنها تحركـ رآسها وهي تقرأ .. مرة قدام ومرة ورى .. البنات كتموا ضحكتهم .. بس مع الأسف جنبي وحدة ما تقدر تتحمل وتسكت .. وضحكت ونزلت رآسها على الطاولة عشان ما تشوفها الإستاذة .. أنا خفت تجينا وتحشرني معاها .. قعدت اضربها على يدها عشان تقوم وشافتني الأستاذة وقالت : خليها خليها ما شاء الله عليها يمكن إنها خاشعة ..
بصراحة ضحكت غصب .. وزميلتي راحت فيها من الضحكـ ... والفصل كله راح ضحكـ .. والمسكينة ما تدري وش فينا !!

وقبل إجازة الحج كانت عندنا حصة انتظار .. وقالت يا بنات اللي عندها اسئلة تسألني .. قلت لزميلاتي خلوا هالمفتية علي أنا ..
وكنت ناوية لها على نية أبي نتيجتها تكون الطرد من الفصل .. عشان أبلغ الإدارة عن السبب .. المهم قلت أستاذة أنا عندي سؤال .. قالت تفضلي ..
قلت : يا أستاذة الحج زحمة مرة .. وأنا أتعب بالزحمة .. عادي لو أحج ألحين قبل الزحمة ؟
قالت بكل براءة : لا لا ما يجوز يا بنتي .. الله خصص للحج شهر معروف و .. و .. <<<< صدقت وما مشت عليها الخطة .. وقلت لها : الله يجزاكـ خير .

،

،

إلى هنا وينتهي الإجرام .