بسم الله الرحمن الرحيم
إخواني وأخواتي أعضاء المنتدى الكرام
السلام عليكم ورحمة الله وبركاته
قبل ما ابدأ بالموضوع أحب اشكر كل اللي ساعدوني على الحصول على معلومات تخص ايطاليا وساعدوني بعد إن رحلتنا تصير حلوه ومريحة . وأتمنى إن الموضوع يعجبكم وسامحوني لأني أبكتب بالعامية.
وبسم الله نبدأ:
كيف اخترنا ايطاليا؟
أنا من زمان ودي أروح لايطاليا وبأحد الأيام جت الايطاليه وكان خط السير كالتالي:
ميلانو 6 أيام ومرينا فيها على كومو وقاردا لاند.
فينيسيا 2
ريميني 3
روما 3
وبكذا يصير مجموع الرحلة 14 يوم
بعد ما قررنا خط السير قررنا إننا نحجز مباشرة من الخطوط السعودية عشان ما نرتبط بمكتب معين واتصلنا على الرقم الموحد للخطوط السعودية وهو: 920022222 وفعلا لقينا حجز بسهوله لايطاليا بس للأسف كانت المقاعد المخفضة محجوزة كلها اللي سعرها 3150
وبكذا طلعت علينا التذكرة ب3450
بعدها بدينا ندور بالنت عن الفنادق المناسبة(واللي بذكرها إن شاء الله حسب روحتنا لها) وكاناعلى اتصال بمكتب العربية للسفر والسياحة عشان تصير الحجوزات من عنده والفنادق اللي ما نلقاها عنده كنا نروح نسال الطيار والفرسان عنها واكتشفنا إن الفنادق اللي عندهم متشابهة وحتى الأسعار بعد.
بعد ما حددنا خيارات الفنادق بدينا نفكر عاد بالفيزا.
الفيزا:
قبل ما نقدم طلب الفيزا كنت شايفه موضوع بالمنتدى عن التقديم للفيزا وبحكم إني ما رحت أوروبا إلا قبل 11 سبتمبر فأكيد القوانين كلها تغيرت وفعلا قريت الموضوع وعرفت وش الأوراق المطلوبة مننا وهي:
تعبئه نموذج طلب الفيزا وتوقيعه من صاحب الجواز
(النموذج ممكن تطبعونه من موقع السفارة الايطاليه وتعبونه أو تستلمونه من السفارة وتعبونه بنفس الوقت مثل ما سوينا)
الجواز ولازم يكون موقع من صاحبه
صوره من الجواز
صورة جديدة وملونه لمقدم الطلب
صوره من بطاقة الأحوال
تامين صحي(يقولون ما يطلبه إلا السفارة الايطاليه؟؟؟ الاسبانيه والفرنسية لا.. والله اعلم )
إثبات وجود سكن على الأقل للأيام الأولى
كشف حساب من البنك لمدة 6شهور سابقة
مبلغ 158 ريال لكل شخص قيمة الفيزا
الشي اللي ما درينا عنه انه لازم ناخذ موعد قبل ما نروح للسفارة ويكون بالاتصال رقم السفارة 4881212 وحنا يوم شفنا نفسنا فاضين الخميس الصبح قلنا خل نروح نقدم الطلبات على بالنا هم ما عندهم إلا حنا؟؟؟
يوم رحنا كاشخين للسفارة وزين كنت رايح مع زوجتي قال لنا السوداني عندكم موعد؟؟ قلنا وشوووو؟؟ وش موعده؟ مسكين جلس يضحك وقال أبدخلك بس عشان المدام معك.. ويومها حسيت اني .
يوم قدمنا الاوراق قالنا لازم تجيبون تأكيد لحجز السكن لان الورقة اللي معنا ما بعد تأكدت.. قلنا ابشر. وطلعنا..
للمعلوميه تقديم الطلبات من الساعة 9- 12 الظهر بس (حسب الموعد اللي بيعطونك إياه)
واستلام الجوازات من عند السكيورتي اللي عند الباب من الساعة 9- 4 العصر
بعد يومين أخذنا أنا ورقة السكن لان زوجي بالشغل ورحت مع خواتي للسفارة و طبعا أنواع التعقيد يوم جينا ندخل حي السفارات وأنواع الاسئله: وش جايبكم؟؟ وش تبون بالسفارة الايطاليه؟؟ وليش بتسافرون؟؟ وليش كلكم جايين وهي وحده اللي بتسافر؟؟ ووووو
المهم رحمونا ودخلونا بالأخير. يوم دخلت وقدمت الورقة لوحده من اللي يشتغلون وقلت لها: خلاص اوكي؟؟ قالت:اوكي. بعد أسبوع تعالوا استلموا الجوازات.
طبعا هم فيه ورقه يحطونها فوق الجواز إذا صار فيه ورقه ناقصة. نست الأخت تشيل الورقة يوم جينا نستلم الجوازات مالقيناها عند السكيورتي يوم دخلنا نسال قالوا ورقة السكن ناقصة يوم نادينا الأخت شكلها توهقت قالت تقدرون تجون بعد يومين وتلقون الجواز جاهز حنا ما حبينا نعقد الموضوع لان باقي على سفرتنا أسبوع وقلنا ما صار إلا الخير.
وفعلا جينا بعد يومين وكان الجواز جاهز.
الاستعداد للسفر:
بديننا بتجهيز الشنط قبل بثلاث أيام تقريبا وكانت قبل بليلة كلها مصكوكة ومن الأشياء المهمة للي اخذنانها معنا :
سجاده للصلاة/ بوصلة لتحديد القبلة /شاحن الجوال /كاميرا ديجتل مع ميموري إضافي وشاحن / فرشة أسنان ومعجون /كريم طارد للناموس / مظلة / جاكيت /كريم حماية من الشمس / حذاء مريح /شنطة يد تنصك بسحاب عشان ما تنفتح بسهوله/ فاوتشرات الفنادق/صورة من الجواز/ أدوات حلاقة رجالية /ادوية للضرورة مثل بنادول او اسبرين دوا للكحه (البندول اخذناه من هناك ب4,5 يورو)
واهم شي تكون الشنط صغيره و مهب مره ثقيلة عشان ما تزعج وقت التنقل بالقطارات.
ايطاليا 
العرض العادي
